Mobile phone

             Tunhma kum kha leh chenah khan mobile phone ka hre ngai lo va, mobile phone atan cheng khat mah ka hmang ral ngai lo, a mamawh pawh ka mamawh hek lo. Tunah zet chuan mobile phone handset kan ti, SIM Card kan ti, topup, recharge, bakah bill nen, SMS pack, a tihtlawmna, etc., pawisa kan khawhral hiau hiau mai. Tunhmaa enge anih pawh kan hriat ngai lem loh kha, kan chul kan chul a, kan hmet neuh neuh va, beng bulah dahin kan titi melh melh ta mai. "Balance ka nei lova" tih te pawh thenkhat tan tawng tualleng a ni chho ta hial mai. 


                Mobile phone dawr ah han kal ila, phone lei tum nge, hmuhnawm thlira thlir ve hrim hrim nge, mi an tam thei ngei mai. Mitin mamawh a ni chho mek zel si, chutihlaiin a tlo lutuk lem si lo, mobile phone zuartu te hi an hlawk thin awm mang e ka ti. A thar hralhna ai mahin acessories neuh neuh leh repairing ringawt pawh hi hlawkpuina tham a tling tho niin a lang bawk si. Mobile phone la nei lovin neih ve ngei an duh a, a nei mek te'n a aia tha neih belh zel an duh bawk a. Mobile phone hi thenkhat tan awlsamna a nih laiin, thenkhat tan chhungkaw nun tibuaitu a ni a, thenkhatin tullovah pawisa khawhral hiau hiau nana kan hman laiin thenkhatin an lo hausakpui bawk anih ber mai maw. Nula tlangval tan te hlei hlei hian a lo va tangkai tak em, thaikawi biahthu leh puarak palai reng a ngai tawh si lo.



                Thianza hovin kan han inkawm a, kan titi a, thil pawimawh kan sawi tan chauh maw tihah phone a lo ri a, chhan dawnin thiante an zahawm si, chhan loh ngawt lah a ni mang si lo. Titi laklawh lai pawh sawi hleih theih a ni ta lo, a duhin kan beng bulah kan dah a, a duhin kun ang chel chawlin kan hmet ang niap niap bawk a. Thu pawimawh khel lai te, office dawr lai te, committee lai tea SMS lo thleng ve thinte pawh hi, a hlut viau rualin, engemawchenah midangte mit tikhamtu a lo ni ve bawk si. Mahse, enge pawi le, mobile phone ka nei a ni tihna a ni mai alawm. Nei lo ila ka hmet ka hmet tawp lovang.



               Ka mobile phone dahna ka hriat loh changin ka han missed call a, a ri ral ral a, a awmna rangtakin ka hre nghal mai. Ka thlauh bo palh a, mifel takin a lo chhar a, ka phone a, min rawn chhang a, tichuan a chhartu chuan thatakin min pe let leh thei. Ka silver thi thlauh bo, bo hlen ta hmak ang kha chu a ni maih lo. Ka dahna ka hriat reng loh thin avanga ka bike chahbi bo ka zawn chiam chiam thinte hi, missed call rik ral ral theih ni ve se ka ti thin kher mai.


               A tel lovin kan khawsa thiam tawh lova, kan kalna apiangah kan keng a, ka awmna hmun chu ka mobile awmna hmun a ni chho ve ta zel mai. A tel lovin ka kim zo lova, a tellovin nikhat pawh a rei zo ta; kan taksa peng pakhat ang maiin kan kiang hnaihah a awm ve ta reng mai chu anih hi. Mobile phone avang hian sana bun a ngai tawh lova, calculator ah a ngai tawh lo va, alarm clock lei a ngai tawh lo va, walkman lawk ber bur paipawn puar ulh a ngai tawh hek lo. "I ngaihthlak zawhah i cassette kha ka lo ngaithla ve ang e," kan intih thinlai te khan mual an liam ta a, mobile phone hmangin kan hla duh apiang kan inpe chhawng zeih zeih tawh mai anih hi. Hmun hla tak taka chhungte leh thiante biak pawh nan thirhrui thawn a ngai tawh lova, bialnu/bialpa/thiante nen thuchhia thutha inhrilhtawn turin dakah lehkha thawn a ngai tawh si lo. He mobile phone tereuh avang hian duh hun hunah internet kan khawih theih phah bawk a. Thlalak nise, duhna hmun hmunah thla kan la pep pep tawh mai bawk nen. He thil tereuhte hian thil tangkai tak tak a lo va fun kim tak em.