Ka BSNL mobile zinkawng

                   Kan rama mobile phone service provider lo lut hmasa ber chu BSNL a ni tih kan hre theuh awm e. A tirah chuan mobile phone hi chuti tehluain a tangkai turah pawh ka lo ngai lem lo va. Thian te, thawhpui te'n an nei sap sap a, neih ve pawh ka tum lem lo. Mahse, nikhua a lo rei a, a pawimawh ta tual tual mai si. Mahse chuti maia awlsamin connection a lo tih theih ikhaw loh mai chu niin. A dilna form ringawt pawh a chuha inchuh a ngai a, thui tak tak intlar a ngai thin a. Hetih kar laka lo innek buai deuh te pawh an awm fo thin a nih kha.

                Mobile neih ve ka duh si, office ah form a awm si lo. Kan chhung te'n form an fill up na hnu, an hman leh duh si loh an kawl hlauh va, correcting fluid tam tawk tak nen ka fill up a, ka submit ve ta a. Sim Card a lo thleng har nangiang mai. Thla tam tak a ral hnuah SIM Card a rawn thleng ve ta hlawl a. SIM Card a lo thlen veleh Mobile handset Sony Ericsson T270 ka lei a. Biak tur ka ngahsa tawh bawk a, hman nghal mai tumin SIM Card ka han thun a, karei leh.....a nung thei chuang reng reng lo. An office lamah ka va kal, an lo la activate rih lo chu niin. An lehkhabupui ah an ziak lut a, chumi hnuah chuan a nung chhawm ve nghal mai turah ngaiin ngaihtha takin ka haw ta a. Ni a ral, chawlhkar a liam, a la nung thei chuang si lo. Ka nghak a, ka nghak zel a, thla tam tak ka nghak ta. Thla thum zet ka nghah hnuah nikhat chu ka phone a rawn nung ve ta hlawl mai. Mi ka duh duh ka be ve thei ta. Thiante zarah SMS thawn dan te ka thiam chho ve zel a, hman a nuam bawk si, rin aiin bill a tam duh khawp mai.

BSNL mobile application form la turin kan intlar

             Thla tam mobile phone ka hman hnuah, vawikhat chu BSNL mobile phone connection ti thar duh tan form an pe chhuak dawn a ni tih chanchinbuah ka hmu hlauh mai a. Ka nu tan form lak chhuahsak ve ka tum a. Zing hma tawk takah ka tho va, form an pekchhuahna hmun, Venglai lamah ka va phei a. A la hma deuh bawk nen, tlem chuan ka zak deuh. Mahse, ka va thlen nak chuan le, mitamtak an lo thu hmuk tawh mai. Tichuan ka han nghak ve ta ren rawn a. Kan Shillong awm ve laia MST bus ticket la tura tlaivara an nghah thin te pawh kha min tihre chhuak rum rum mai. Duh nei ka nia, ka duhna tipuitling tur chuan dawhthei taka ka nghah a ngai miau si a le. Ni a  tlangsang zel a, intlar kan tam tulh tulh, form an pechhuak lawk si lo, ril a tam tan ta, han phunnawi lah chu a ni chiah mang si lo. Ka va han ning tak e aw..... Ka hnunglamah intlar an thahnem bawk a, chang lo tur an tam dawn tih a lang reng mai. Application form la turin zing hma tak, khuantevikah ka tho va, ka lakchhuah meuh chuan fehrehsan hunlai a ni tawh. Tichuan hlimtak leh intithei tak chungin ka haw ta a. Khang hunlai kha chuan BSNL ho kha an va thu veu veu tak e aw....

               Mobile phone rawn lar chhoh tirh lam kha chuan prepaid hi a awm lo hrim hrim a, harsa taka kan neih ve theih chhun chu postpaid a ni mai. Bill dik lo lah kha a tam thei si, bill pe tur ringawta intlar te kha a va han ninawm thin tak em. Tunah zet chuan BSNL ni lo, Service Provider dang an tam ta a, duh thlang thei dinhmunah kan ding tawh a, SIM Card lah duh hun hunah neih theih maiin a awm tawh si, thil hi a lo va han awlsam sawt tak em.

Unlimited SMS pack:

            Vawikhat chu kan thawhpuipa in ka phone a khawih a, ngawi rengin Unlimited SMS pack min subscribe sak ringawt mai a. Thlakhatah cheng 50 a ni a, SMS duhtawkin, man chawi belh tawh miah lovin kan thawn thei dawn tihna a lo ni. Hemi hnu hi chuan a maka maka tam SMS ho mai mai ka han thawn ta mai thin anih kha. Tun thleng hian ka SMS dawng thin ho khan fiamthuin an la sawi chhuak fo thin, ka thawn chhuak hnem thawkhat bawk a ni e. Airtel leh Reliance Mizorama an rawn luh hnu kha chuan ka bill kha a sang thei ta viau mai a. A tira SMS zawng zawng free vek emaw ka tih kha a lo ni reng reng lo, BSNL ah chauh a lo free thin kha a lo nia. A tawpah phei chuan SMS avangin ka bill a sang thei ta lutuk a, Unlimited SMS pack chu ka unsubscribe ta nge nge a, ka thaw a veng ta huai mai.

Hello Tunes:

            

              Engemaw hunlai atangin mi ka phone reng reng hian zai chi hrang hrang, a then chu mawi tak tak, a then chu ho mai mai, ka hre ta fo mai a. Mak ka ti thin kher mai. A tirah phei chuan signal a awm lo tihna anih ringin an lo pick up hmain ka dah leh mai thin a. A hnuah chuan Hello tunes ani tih ka hre ta a. Vawi khat chu kan thianpa ka be dawn a, phone a ring hmain hmeichhia a tawng zaih zaih a, "star mark hmet rawh" tih te a rawn sawi tel a, be tlang tur chuan star mark hmeh a ngai anih ringin ka'n hmet ngawt mai a le. Chumi ni atang chuan ka tum miah lohvin Hello Tunes ka subscribe chu a ni reng mai. Thlatinin Hello tunes hman manah cheng sawmhnih ka chawi tel ta ziah mai a. Hei hian ka mobile bill a tihsan phah hle a. Tihtawp tumin vawihnih lai mai Office ah ka kal thlawn a. SMS hmanga tihtawp dan tur pawh min hrilh, mahse a tawp thei tlat lo. Vanneihthlak takin Aizawl BSNL Office-a thawk pakhatin min tihtawp sak ta a. Ka thaw a veng ta huai mai.

BSNL GPRS:

                 BSNL GPRS a hman theih a, duhtawkin mobile atangin internet a khawih theih tawh a ni tih ka hriat veleh rang takin Office ah ka kal a, 199 Unlimited Plan chu ka subscribe ve ta a. GSM a ni bawk a, phone-a a chak viau laiin, computer nena thlun zawm chuan a muang thei kher mai. Phone atang ringawta hman aralah chuan rinaiin a lo hman tlem theih hle mai si a, unlimited pui pui ka lo mamawh awzawng lo mai. Anmahni website atangin ka han check chiang a, thlakhata Rs 49 lek chawi hian duhtawkin GPRS ka hmang thei reng a ni tih ka hria. Tichuan ka plan ak thlak leh ta a, Rs 49 plan ka subscribe a, chutah chuan 500mb free usage a awm a. 500mb hi phone atang chuan hman ral mai mai a har hle (thil kan download te anih ngawt loh chuan). Thla khata Rs 49 lek hian phone atanga internet ka hmanna tura ka mamawh chu a phuhruk hneh khawpin ka hria.

3G:

             Phone nei changkang deuh te'n an phone ah 3G signal a rawn lan thin thu an sawi thin a, chu chuan phone thar neih min chak tir a. Tichuan ka chakna chu upbet o ta lovin, nei leh nei lovin, chhungkaw khawsak harsatzia pawh haider lui tlat chung leh puk chawp tak meuh meuhvin phone thar Nokia N79 ka han sual chhuak leh ta hluai mai. A hmel enin a tlawm na a, a hmanraw chhawm tel ho erawh a tha phian reuh hlawm. Ka duh ber 3G signal pawh chak tha pur pur tak a ni. Computerah ka han connect a, TATA photon aia a muan bik em emna pawh ka hmu lo, phone atangin youtube video a en zar zar theih bawk si. Ka han hmet a, ka duh duh website ah a lut zur zur a, 3.5G a nih phei chuan duh aiin a hmanhmawh mah mah a ni lo maw aw, tih mai tur a ni thin. Ka neih tirh lam khan Pu Kawlhawka nen pawh video call in kan inbe zeuh zeuh thin tih hi ka'n belh zauh teh ang.

Postpaid Bill:

            Mobile postpaid hman a ninawm em emna pakhat chu bill pek huna thui tak tak intlar ngai thin hi a niawm e. Bill a thleng har si, bill pe duh kan tam thei si, thui tak tak intlar a ngai thin a, a ninawma a ninawm theih zia mai chuh. Hma ami te'n bill 4/5 an ken phei chuan thin a rim hlur thei nia maw le. Mahse, online hmangin bill pe ila, heng harsatna te hi awlsam takin a paltlang theih. Netbanking nei tan chuan awlsam tak bill pek mai dan a awm a, a duh tan chuan hei Bsnl mobile bill pek dan awlsam hi  chhiar mai tur a ni e.

Mobile Tips: 

Mi tih thikin Mobile Tips tlem azawng ka'n ziak ve zuai ang e:

1. Mi be tlem ila, SMS pawh a free chin bak hi chu thawn chhuah belh vak lo ila, phone bill sang lutuk tur lakah a inven ve theih.

2. BSNL GPRS hi postpaid ah chuan 49 plan subscribe i la, prepaid ah chuan 54 voucher thun ila, a tha tawk khawp mai. Thla khat chhung validity a nia, 500mb free data usage a ni bawk. Phone atang ringawt chuan kan hmang zo hman chuang lo.

3. I phone in 3G a man thei anih chuan computer nen thlun zawm la, internet han connect teh, a chak tha vei par par riau asin.

4. Hello tunes hi hmang duh suh, miin an lo biak chea zai i ngaihthlak tir man kha i chawi ziah; thil tul lo tak a ni. Service Provider ho sum siamna awlsam mai maiah ka ngai.

5. Prepaid hmang thin tan chuan Mobile Banking neih hi a tangkai, duh hun hunah top up a thun theih reng a, zanlaiah emaw, zinna ah emaw, topup ah buaina a awm ve lo.

6. Inbiak rei hian pawisa a kal chak duh hle a, chuvangin mi kan biak reng rengin be rei lo ila, pehhel kual chiam chiam lovin kan sawi tum tak kha sawi chat chat ila, hun hlu tak kan save bakah thlakhata bill tlingkhawm tam tak kan save thei bawk.

7. "Ka missed call hi hmu se, min rawn be let rawh se, tichuan pawisa ka save a ni mai" tih ching an awm thin. Hetiang hi ka ngei zawng tak a ni a, tih loh hram a tha.

8. Rei tak tak phone hmanga inbiak thin hian, midang min be ve duhtu te tan kawng kan ping tlat a ni tih hria hre miah lo hi kan tam asin aw....