Mi ram thil kan ngaisang thin si a

              Shillonga lehkha zira kan awm ve lai khan khasi ho vawksa kha kan lei thin a, a vawka a te thei si, a thau a pan thei si, a hmui lo bawk si, Zoram lama kan vawksa ei thin kha kan ngai thei thin hle. Chutah mahni khuaah kan han awm ve ta cheng a, 'Shillong vawsa rep ngat' kha hralh a tla leh em em tho si. Khasi ho vawksa kha a tui bik vang a lo ni lo, a hming, 'Shillong' tih hrim hrim kha kan ngaisang tel ni ta berin ka hria. Keini zawng, mahni ram ami aia mi ram thilte ngaisang thinmi kan ni si a.

               Vawi khat chu nu pakhat hian kuhva hring a rawn zuar a, "Shillong kuhva ngat a nih hi, a tui a nia, lei ve rawh u," a rawn tia. Kei ta pek chuan, Shillong kuhva a tui bik loh zia te, Shillong kan awm laia Zoram kuhva ro ei kan chak thin zia te, Shillong balhla phei chu a tui loh zia te ka han fah chiam kha. Thlai lamah na na na chuan Mizoram chhung ngeia kan thlai thar te hi an zahpuiawm loh thin asin. Mahse keini zawng mi ram ngaisang thin mi kan nia.

              Kan ram hi, kan hriat theuh angin, leilung chungril atanga laihchhuah lamah a pachhe hle a, lungalhthei takngial pawh laihchhuah tur kan nei lo. Mahse buh leh bal, thlai hnephnawl leh thei lamah na na na chuan, mi ram thar chhuah aia a tui loh bikna leh a hlut loh buikna reng reng a awm miah lo. Antam, maian, behlawi, bawkbawn, samtawk, tec., kan ram ami ngei hi a lo tui asin. Artu zuar ho pawh hian, 'sap artui' zuar tel ta se, an hralh chak ang chu aw......keini zawng, mi ram thil te ngaisang thinmi kan ni miau si a.

              Tunhma kan pi leh pu hunlai ata tawh pangpar mawi tak leh, khawi atan pawha iai awm loh, a par chuai har si, zamzo par chi hrang hrang kan nei a. Chu ai chuan a aia mawi lo zawk, dawl hnah ang tak, plastic atanga siam ni mai awm zawk tak, anthurium kan ngaisang thar thut a, a chin kan intihhmuh a, mawi kan intihsiak a, a mawi ti lo chu kan dah hniam lek lek zawk hial a. Mahse uluk taka ka en cheuh cheuh chuan, keia mitah zawng, anthurium par ai ngawt chuan zamzo par hi a mawi ka ti zawk daih. A lei pawh ka la lei miah lo. Mahse, keini zawng, mi ram thilte ngaisang thin kan ni miau si a le.

             Iptechei leh khumbeu te pawh engemaw chang chuan kan chawi vul a, kan ram rawn tlawh thintu mithenkhat te pawh kan lo present thin. Mahse, kan mi present thinte hian khawlaiah an khumin an ak chhuak ngam ang em le? Tumah ina inbel nana kan hman that peih loh iptechei leh khumbeu te hi, kan ram rawn tlawh thintu te hian an ngaisangin kan ring ang em le? Ramdang mite kan present a, keinin engatan mah kan ti si lo. Mi ram kutchhuak chu nise kan ngaisang hle awm si. Keini zawng, miram thilte ngaisang thinmi kan ni miau si a.

                Vawikhat chu kan tlangval laiin nula kan rim a. Kan titi a, akn hlim ve dar dar hle. Chutihlai tak chuan mikhual tlangval, handyman, driverin kuhva leh sikret a leitir ni ngei tur a ni, a rawn lang hlawl mai a, over-coat lampang lek lek a rawn ha a, meizial kawisawi takin a petkawh bawk a, kan nula rim lai chuan a mit a lasawn thei tawh lo. Keini chu kan lang nghal lap mai. Kan nula te lah hian khawtual tlangval an hriatchian tak takte ai chuan mikhual tlangval emaw, hnamdang emaw pawh, an mihriatchian miah loh pawh nise, an ngaihven zawk a, an tan an inkau zawk fo thin. Sap ngaisang ho lah hi, an mingaihsante awmna a hla ropui si a aw....... Keini ve hi zawng, sap ngaisang ta reng reng hi kan nia......

               Tunah zawng, mi kan fing chho ve ta zel a, mi rama thil awm te'n anmahniah hlutna an nei theuh ang hian, kan rama thil awmte pawh hian hlutna bik riau an nei ve ani tih te pawh kan hre chho chhawm ve ta zel a. State dang water bottle aia kan ram chhuak ngei water bottle a thatloh bikna a awm loh zia te pawh kan hrechhuak tan niin a lang. Teak anih mai avanga teak thingtum, uipum rual lek lek, furniture atana hman ai chuan kan ram tualto ngei, ngiau puichang hi furniture atan a lo that zawk zia te pawh kan hre chho ta zel a. Foreign mau tha chi aiin kan rama kan mau neih chhunte kan hman tangkai theih zawk zia te pawh kan hre chiang ta hle mai. Uluk takin sawisa peih ila chuan Darjeeling thingpuife aia kan zothingpuife hi a tui loh bikna chhan tur reng reng ka hre lo. Mahse e, keini zawng, mahni rama thil awmte aia mi rama thil awmte ngaisang thinmi kan ni si a.