Van thilpek tem zeta tluksantu chu

               

                Thil dang ziak ziak a, Pathian thu lam ziak ngai miah loh em em zawng, a dik lo ve. Thiam lo chung chungin ka'n thai kual ve leh mai mai ang e. Ka thleng sang lo bawk a, Pathian thuah leh thlarau lamah chuan 'nausen' ang mai ka ni. Nausen tawng zawng a fiah ngai lova, a thu pawh a ril ve ngai tak tak ngai si lo va.. Ka hriatna tlemte atangin ka han ziak ve leh rawih anih hi. 

Krista nun tawmtu te

               Pathian thu hriltu te'n thu tha tinreng, kristian nun dan tur te, kan tihtur leh tih loh tur te, Pathian thu tha tak tak min fah a. An thuhril leh an thahnemngaihna azarah Krista kan zuina kawngah kawng dikah min kaihhruaiin nunkawng dik min kawhhmuh a, hun harsa ah pawh Lalpa kawng te kan hmufiah leh thin. Sual hawisanin a hnenah kan intulut a, kan taksa ah sualin hmun a chang ve tawh lova, Krista nun chu kan tawmpui ve ta a. Hmana mihring hlui kha Krista Isua ah chuan siam thar leha awmin mithar kan lo ni ta. Thil hlui te'n mual min liamsan a, nun tharin kan lo nung ta. A thihnaah kan sualte phum bova awmin a thawhlehna tawmpuitu te kan ni a, Krista ro luahpuitu te kan lo ni ta.

Thlemin kan awm fo thin

                 Kan chhandamna hi kan felna leh kan thatna vanga kan hlawh chhuah a ni lova. Kan Lal Isua Krista hmangaihna leh khawngaihna avang chauh a ni. Krista hnung kan zui hnu hian Setana chuan ama lam kir leh turin nitin, darkar tinin min sawm reng thin a. Thlemna hmanrua chitin reng hmangin min thlem a, kan chak lohna lai leh kan sihhnipna lai zawn a hre thei em em thin a. Chulaiah tak chuan min rawn bei chat thin. Isua Krista meuh pawh thlem ngamtu khan keini hi min va thlahthlam mai mai dawn lo chiang tak em. Chatuan hremhmun pana a kal mek lai hian, a kalna hmun tura min liampui ve ngei tumin theihtawp a chhuah thin. Pathian hnen atanga min lak bova, hmangaihtu Pathian rilru tihnat chu a chawtui ber a ni si a. 

                Mihringin thlemna kan tawh dan chen a inang lo thei hle a. Thenkhat tana thlemna ni zo hauh lo kha, thenkhat tan erawh, tawrh zawh rual loh thlemna a tling si. Nun kawngdik pangai zawh thin mi chuan atan thlemna a tlem bik a, kawng suala zawha zawh thuk apiangin thlemna a tawrh a nasa thin. Thlemna hi a nasa emaw, a nep emaw, kan tawrh hi Lalpa'n a phal a ni.

Tluksantu dinhmun

               Thir chhertu in thir leh rangkachak a chher thianghlim thin ang hian kan taksa, kan rilru, kan thinlung, hi Pathianin a thian thianghlim tawh a, chu chu keini pawhin kan vawn thianghlim chhunzawm reng a ngai tawh thin. Invawn thianghlim tum chuang lova, a hnua "Ka chau" tia camping neihna lama tlan luh leh chuk chuk pawh hi a fuh ber lo. Thlarauva khah reng chu thil har a ni, mahse, nitina tawngtaia Pathian pawl thin leh Pathian mite inpawlhonaa tel zel thin mi chu thlemna nasa tak pawhin a ngam ngai lovang. "Tu pawh leilehnaa kut nghat a, hnunglam en chu Pathian rama mi ni tlak an ni si lo (Luka 9:62)" tih thu leh, "Ka lokal leh thuai dawn e; tuman i lallukhum chu an laksak loh nan che i thil neih sa kha vawng tlat rawh (Thupuan 3:11)," thu te hi hriatrenga inven fimkhur reng a tul takzet a ni.

              Inveng fimkhur reng peih lo mi te chu Setana thlemna nasatak lak ata an inthiar fihlim zo lovin, an inveng zo thin lo va. Thlemna do zo lovin an nuhlui ah an kir leh a, hmana an tih thin te kha an lo ti leh ta a. Pathian a hlat tial tial a, a inkhawm ngai ta lo va, a tawngtai ngai tawh lova, Pathian thu a chhiar peih tawh lova, a tuipui tawh hek lo. Pathian fak nan a ka a ang ngai tawh lova, Pathian thu thutak hlamchhiahin khawvel chanchin a ngaihven ta zawk a, thu puarpawleng leh thawn thu mai mai a tuipui tawh zawk a. A nunkhua a ro zo tawh a, a rilru tihchawlawla awmin Lalpa hnaih leha Lalpa lama kir leh nachang reng reng a hre tawh lo. A hmaa Pathian thu a hriat sil ve nial nual te kha, a ni lo zawngin a hmang tangkai a, Pathian thu hrilhtu te, amah zilhtu te lo hnial let nan leh thuhriltu te lo hnial nan a hmang tawh zawk thin.Tunah zet chuan, hmana Lalpa tana buhsengtu ni thin kha, lakkhawmpuitu ni tawh lovin, a leng darhtu a lo ni tawh zawk ta. Amahah Setana'n ram a zauh tial tial a, a insawh nghet tial tial thin. Lalpa'n a thisena a tlen thianghlim tawh, a thinlung temple ah chuan thim lal Diabola chuan hmun a chang zo ta. Atan chuan Pa hnena kir leh tur chuan kawng a khirh em em tawh thin. "Thutak hriatna famkim chu kan chan hnua thil kan tihsual luih si chuan sualte tana inthawina a awm tawh hauh lovang (Hebrai 10:26)," tih ziak a ni si a.

              Pathian thu hi a daw ngai lova, a thleng dik zel bawk thin. Krista kan zuina kawngpui atanga a nilo lama kan peng palh a, kan kir leh mai lova kan tluk hlen san anih vaih chuan, Krista sipai huaisen ni thin kha, amah phatsantu niin Setana sipai huaisen ah kan inlet mai dawn a lo ni. Tluksantu leh phatsantu dinhmun hi chu a duhawm loh hle dawn si a.Ram leh hnam phatsantu te, mahni mihringpui phatsantu mah kan huat a, a na thei ang bera kan hrem lai hian, Pathian meuh phatsantu chung chu a va pik dawn tak em. "Tin, vawikhat rilru tihvar a, van thilpek tem a, Thlarau Thianghlim chantir a, Pathian thu tha leh hun lo la awm tura thiltihtheihna tem tawh zet a, tluksante kawng thu zawng- chu mite chu an simna turin siam thar leh rual a ni lo, Pathian fapa chu anmahni tan khengbet nawn leha timualpho an nih avangin (Hebrai 6:4-6)," tiin chiang taka ziak ani si a. Pathian hawisantu leh amah timualphotu kan nih lohna turin kan nun hi vawn uluk a lo va ngai dawn tak em.