Photon vrs Broadband

 TATA Photon ka lei ve a

                  Thiante ak ruala ak ve ka duh miau si a, chutihlaiin mamawh niah ka inngai ve bawk nen, nei leh nei lovin TATA Photon Whiz ka lei ve a. A te reuh si, leklam a awlsam a, kalna hmun apiangah a ken sawn theih bawk nen, a tangkaiin a tha reuh kher mai. Photon Plus chu a tluk lo na a, browsing nan leh file tetakte te han download zung zung nan a tangkai reuh khawp mai. Thlatawpah a hlawma bill pek a ngai lo va, dawrah ka kal a, ka duh zat sawiin recharge leh top up ka thun mai thin a, a awlsam phian mai.

Rin aiin a va to e

                Chutia ngaihtha taka ka hman lai chuan recharge ka duh aiin top up ka thun zing ta malh malh hle mai a. Thla khat chhunga Recharge leh top up ka hman ral zat chu Rs 1000 a tling chho deuh reng ta mai. Heti reng reng chu a tiin thlakhat tawp unlimited Rs 800 man bawr vel ka thun ta a, ngaih a ngam ta huai mai. Thla khat chhung chu ka duhtawka nasain ka han browse kual vel ta a. File tenau thenkhat ka download bawk a. Top up thun belh a ngai ta lo bawk a, ka thla a muang siai kher mai. Chutah thla a lo thar leh a, unlimited ka tlin loh avangin Rs 400 man bawr velin ka recharge leh a. Mahse a balance lut tur zat a lut tling ta reng reng lo. Unlimited ka thun chhunga file ka download na man kha a in cut ta hmak mai. "Unlimited alawm" tia ngaihtha taka ka hman kha, a lo unlimited chiangkuang chiah lo chu niin. Movies phei chu download ta ila, ka chawi nasa hle dawn tihna a lo ni reng mai. Chuta tang chuan ka hmang tha duh ta mang lo va, ka dah vel ta mai mai. Hmang lo na na na chu balance erawh a kiam chuang lem bik lo.

            Nikhua a lo rei a, unlimited man pawh a lo tlahniam ve leh ta a, Rs 555 in thlakhat unlimited a hman theih ta a. Mahse ka ngaih a ngam zan chuang lo. Eng pawh nise, ka mamawh miau si a le, 555 hamng chuan unlimited ka han recharge ve leh ta a. File download loh hram hram ka tum a, chuti chung chuan mamawh enge maw download loh theih loh a lo awm ve leh tho va, a hmain balance ka lo neisa tho bawk nen, ka han download ve leh ta a. Thla khat a liam hnua ka han rechare leh chuan pawisa engemaw zat, download man a in cut ta tho va. Unlimited ni tho bawk si, file download apianga pawisa a in cut zel thin chuan thin a tiur thin kher mai.

GPRS unlimited meuh pawh unlimited a nia sin maw le.

             BSNL Gprs unlimited 199 plan a awm lai khan ka subscribe ve thin a. Computer nena thlunzawmin zan rei tak tak thlengin ka hmang zantin a, inrinni leh sunday phei chuan ka hmang nileng deuhthaw thin. Khatih lai khan 3G a la nih loh vang nge GPRS kha a chak vak lo hle thin. Mahse, BSNL hovin 199 unlimited an tih kha chu, unlimited diktak a ni. 199 bak engmah ka chawi belh ngai lo. Bill ah pawh subscription fee 199 ka pek kha a inziak a, data ka hman zat a inziak bawk a, hman manah erawh 0.00 tiin a inziak thin. "Unlimited rau rau a lo inang lo thin hle mai" ka ti vawng vawng thin.

           3G signal ka man that hnu kha chuan ka phone leh computer ka thlunzawm a, hman a nuam par par thin hle. Mahse unlimited 199 an thai bo daih a, 199 man subscribe chuan 4 Gb chauh thla khat chhungin free a lo ni ta a, inren tak chunga hman a ngai leh ta tho mai. Internet khawih reng duh tan chuan inren hi a harsa a nia aw....

Broadband ka connect ve ta mai

                Internet hman ve reng ka duh si, Photon ah lah a unlimited dan a chiangkuang lo hle mai si, unlimited hmang chunga inren reng renga internet hman chu hrehawm ve deuh mai a nia. Enge maw le, kan nunah hian duhzawng leh itawng kan nei thin a, kan itzawng nazawng kan nei thei lo, chutihlaiin nitin zantina ka hman duh internet na na na hi chu neihthinglungkhawng takmeuh pawhin neih ve dan i ngaihtuah mai teh ang, tiin neilo chungin ka han connect ve ta rawih mai. Chhungte lakah a inthlahrunawm duh khawp mai.


               Thlakhata unlimited 750 plan ka la a, bill chu 850 bawr vel tur a ni. Engkim unlimited anih rau rau chuan TATA photon Whiz unlimited ai chaun a la tha thovin ka hria. 20% min discount sak thei ani tih ka hriat phei chuan ka phur kher mai. A rang a rangin discount anih theih nan hma ka la nghal a. Tichuan ka thlatin bill chu Rs 650 atanga 670 inkar a ni ta ziah a ni. (Mobile network a that loh changa landline phone ka hman zeuh chang hian bill tlemte tein a danglam keuh keuh thin). Duhtawkin youtube movies ka download thei ta a, misual.com vela video clip an rawn dah pawh buaina awm map lovin ka download ngam ta a, mp3 nen, torrent file movies nen, ren map lovin ka download par par reng ta mai. Vacation ah te, Holliday ah te, Saturday leh Sunday ah te duhtawka internet ka hman a, zantin zan rei tak tak thleng internet ka hman paw'n bill a san phah chuang si lo. Unlimited theuh theuh, a va lo inthlau thei tak em.

              Internet hmang tam thin i nih chuan Broadband subscribe law law mai rawh. Thla khat chhunga i pawisa sen ral zat chhutin Broadband connect mai kha enge maw chenah a hlawk zawk maithei. Mobile phone atangin internet hman man a tlawm zawk; hei hi chu a chiang khawp mai. Mahse, computer nena inthlunzawm a, mobile kha modem anga kan hmang duh anih chuan, a hlawk hlawl lo. Mobile ah leh computer ah chuan a phek a inlen hleih lulei lutuk a, a tihchi vak loh.

              I network a chak lo anih chuan browser atan Opera hmang rawh. Opera ah hian automatic in file a in compress thei a, i net a chak loh chang chuan a in compress ang a, net chak lo chung pawhin a in load ve mai thin ang. Network a chak erawh chuan Mozilla Firefox nge nge hi a tha ka ti.

            Torrent hmanga film download tur hi awm ta lo se, keini ang mirethei tan chuan unlimited broadband hian hlutna pakhat mah a nei tawh lovang tih hi ka han belh tel ve mai mai teh ang.