Sava khawngaihthlak

                    Dt 28th November zan zanlai ah sava pakhat kan verandah ah rawn kaiin kan tui barrel phenah awmhmun a khuar a. Zingah kan han en nak chuan sava lian leh mawi tak mai a lo ni a. Atirah chuan ramparva emaw ka ti a, chumi hnuah vahui a ang kan ti em em a. A chang sei mawi tak pakhat chu kan man laia a tal nasat vangin a thlawn hlauh mai a, ka ui kher mai. Chu sava chu ka han belchiang a, a awmah hliam chhete a lo tuar chu niin. Sava pawisawi lo leh mawi tak tak te tihhlum kan ching thin leh hliam kan tawrhtir thin hi chu a pawi a ni.

               A hliamah damdawi ka hnawih a, tichuan a thlawh chhuah mai loh nan hruiin ka hling a. Chhuak ta se, khawpui chhung a ni si a, mi'n an tihlum rang viauin a rinawm si a. Nuhnun rah hmin kan pe a a, a bak chu pek mai tur kan hre lo. A tui a hal a niang, tui pawh a in ve. Dah tawp mai loh chu tihngaihna a vang kher mai. 

Tu pa kutthak hrep nge maw he sava khawngaihthlak tak hian a lo tawrh le??

                Vahui ni ngeia kan rin laiin a hrechiang em emtu ka puin Dawntliang anih thu min hrilh a. Sava vang tawh tak anih thu a sawi nghe nghe. Talh mai lo rawt tawk te, khawi atana min dil te, leichhawn atana min dil te, leh Forest Department lama hlan mai tura min ti te pawh an awm a. Talh ka remti lova, khawi ka phal lova, hralh  lah ka remti hek lo. Forest Deptt lama hlan phei chu ka tum therte lo. A damchhunga thirlen chhunga khung atan chuan he sava hi ka phal teuh lo mai. A chenna tura Pathian siam, ramhnuai ah ngei ka chhuah zalen tur a ni. Mangangin min rawn pan a, ka lo tanpui ngei ngei tur a ni.


               Tlai lam a lo ni a, thlasik khua a nih tawh vangin a vawt kher mai. Huana ka sava thlun chu ka lalut a. Ka fapa chuan a khawngaih ngang a niang, "A pa, a awmna tur, bu, siam sak ang," a ti mauh mai. Savabu siam ai chuan a in tur siam mai hi a awlsam zawk ka ring a. Tlai thim dawn aruaiah lehkhakhawng bawm zawngin dawr lamah ka han tlan chho va, chumi hmang chuan engtin tin emaw a in tur chu kan siamsak ve ta a. A ina kan khung chu a awm ngai lohna ni ngei tur a ni, a tal ri phurh phurh mai.

Savate hi

               Chungleng sava te hi an hram a mawi a, ramhnuaia an chiar ri nak nak hriat te hi a va hahdamthlak tehlul em. Thangfen hram te, kulher hram te hi a mawi ka ti thin. Ramar hram ri hriat tur van tawh zia te hi aw. Rawng chi hrang hrang nei sava te hi, mahni tawkah an mawi em em vek mai. Sava mawi tak tak thingzara an chiar nak nak te, rampalailenga an hram ri mawi tak tak hriat te hi a nawm tehlul nen, sava han hmuh hlek changa a mawina lam aia a sa tui zia tur hlir rilrua a lut thin hi, kan sim vat vat loh chuan kan rama savate hian kan ram hi awmna tlak lohvah an la ngai thuai ang.

                   Sava hi ramngawa cheng thin an ni a, kan humhalh duh anih chuan an chenna hmun ramngaw ah ngei kan humhalh tur a ni. An chenna hmunah an eitur rahtlan emaw a awm lo anih chuan phun sak mai ila. Khawpui chhunga rem leh rem lova thing phun leh chiam thin ai chuan ramhnuaia rahtlan kung pakhat lek kan phun puitlin hian ramsa te tan hna ropui tak kan thawhsak a ni tih i hre thar teh ang u. Inah thirbawm chhung emawa duat taka khawi ai chuan, anmahni chenna hmun tur diktak ramhnuaia chhuah zalen mai hi ka duh dan a ni.


Kan chhuah zalen e

                   Ka duhdan hi ka fapa hian min tawmpui hle a, chhuah zalen hun tur a nghakhlelin chhuah a ngen reng mai. A duat a, a ngaihsak bawk a, zing a thawh veleh nilum ai turin a bawm a khai chhuak a. A kiangah a awm chawt a ni deuh ber mai. Chhuah zalen thuai thuai a nghakhlel si a, chutihlaiin a hliam a hil tha a, amah a hrah tha bawk a, tichuan chhuah kan tum ta a. Ama kut ngeia chhuah a duh si, a sikul bang ka nghak ngat ngat a, a ban veleh hlim takin a thlawhchhuah tir ta a. Kan chhuahna lai hmun hi, a thlanglam zawng zawng ramngaw vek a ni a, ralkhat hlatak thlengin ramhnuai a ni.