Bible hi Pathian lehkhabu thianghlim, Pathian thu ziakna, Pathian thawkkhum a ni a. A hluin a ropui hle. A ropuina leh a hlutna hai chhuak tur chuan chhiar tama zir tam erawh a ngai thin. Pathian thu thiltihtheih zia hi a tawng tawh mi tam tak an awm a, an la awm zel bawk ang. Mihring hian chuai ni leh ral ni a nei thin a, khawvel pawhin tawpni a la nei ngei ang, Pathian thu erawh chatuanin a nung reng ang a, tawpni reng a nei dawn hauh lo.
Kan Bible an lehlinna hi a original hle anih ka ring a. A chhunga hming awm te pawh hi sap hming ai chuan Hebrai ho hming a ang hle zawk. Sap ho hi chuan an hnam hming milpuiin Bible-a hming awmte an dah siksawi kual mai a, kan bible ah erawh a original hming angin a awm mai. Jakob-a pawh kan ti hJames ve he hu loh hi.
Mahse sap ngaisang hnam kan ni a, sap ho tih entawn thin kan ni. Sap ho hi chu an thiangzau hle a, an tihdan kan copy chho ve anih vaih chuan kan bible hi, nakinah chuan version hrang hrang kan la nei ve nuaih maithei a ni.Tunah pawh hian mi'n Bible a chhiar dawnin chhut thar, chhut hlui, tia a sawi a ngai tan der tawh a nia.
Kan bible letlingtu hmasa te kha an fimkhur hle a, tawngkam pawh an uluk hle. Mizotawng ziak dan diktaka ziak, reference hial atan pawha hmantlak chu kan Bible ngei hi niin ka hre thin. Thu uar a tulna laiah pawh an uar thiam hle. Tawngkam ulh leh hrilhfiah ngaihna lai pawh a awm nual. Hetiang ang tawngkam ulh lai hi siam that an duh anih pawhin siamtha mai se, a zavaia siam that vek erawh hi chu thil tul lo tak niin ka hria. King James Version ang chiah chiah neih ve kher hi a tul lem lo. Kan ngaihsan em em sap ho hi, rinna lamah chuan an pachhe ve teh mai ania. Rinna lamah chuan kan chung en kher tur a ni lova, Bible an chawh kual ang hian kan chinglet ve kher tur a ni lo. Bible hi kan duh duha kan chinphar kual tur a ni lo. Kan rinna innghahna bul a ni a, thu harsa lai deuh a lo awm anih pawhin kan zir ve mai tur a ni. Hetih lam kawngah hian Muslim ho hi an conservative khawp mai. An ni chuan an thurin bu Quran hi chin pawr ve mai mai an phal hauh lo. Keini zawng kan at huai a, Pathianthu te hi kan duh dan danin kan chingphar a, kan duhlai lai kan la kawi a, Pathian hming pawh kan duh hun hunah a naranin kan lam mai mai a nih hi.
Tunlaiah mi tam takin Nibiru leh X-planet te lo buaipuiin khawvel tawp dan tur lo puang lawk thin mahse, keini ringtu te chuan Pathian lehkhabu thianghlima inziak bak hi chu ring lo ila a fuh ber awm e. Hmasang Babylonian leh Sumerian ho te leh Mayan ho te rindan ai chuan kan Pathian thu thianghlimin a sawi hi a rintlak zawk zia leh tawpna ni chu Pa Pathian chauhvina a hriat zia kan Lal Isuan a sawi te hi a dik zawk zia te fiahin a la awm thuai ang.
Tunlaiah mi tam takin Nibiru leh X-planet te lo buaipuiin khawvel tawp dan tur lo puang lawk thin mahse, keini ringtu te chuan Pathian lehkhabu thianghlima inziak bak hi chu ring lo ila a fuh ber awm e. Hmasang Babylonian leh Sumerian ho te leh Mayan ho te rindan ai chuan kan Pathian thu thianghlimin a sawi hi a rintlak zawk zia leh tawpna ni chu Pa Pathian chauhvina a hriat zia kan Lal Isuan a sawi te hi a dik zawk zia te fiahin a la awm thuai ang.
A thain a ngaihnawm khawp mai. Ni e, kan Bible letlingtute khan an lo ulukin an lo bei nasa awm ngawt mai. Chutih laiin tihsual leh fuh lo lai a awm zeuh zeuh tho a. English ho kan ngaihsanna rau hian kawng engkimah min nghawng mek a, Bible chu nghawng em suh se. I thahnemngai rawl hriat a nuam khawp mai.
ReplyDeleteTS, ka lawm e. Kan Bible hi tuna sap ho version thar atanga lehlin anih loh avangin King James version thar lo chhuak te nen hian a inang thei lo hrim hrim a, chumi mil thei tura lo siksawi kual chiam chiam hi a fuh lo a ni. Chutilaiin thu ulh lutuk a awm anih chuan, chumi laite chauh chu siam that ni thei se. Hman deuh hleka kan Bible chhut thar anga Genesis tantir atanga sentence tin deuhthaw khawih danglam kha chu a fuh thei lo a ni.
ReplyDeleteKa rilruah a lo lang thut a, ka han thai ve puat puat ngawt anih hi.
I thil sawi hi ka vei ve thin khawp mai. Tin, sap ho kan ngaisang lutuk hrim hrim pawh hian kan nitin nunah nghawng thalo a nei ka ti ve tlat. An nun tha lai entawn thei ila chuan a ziaawm deuh tur ania.
ReplyDeleteBible hi hmanah vawi hnih chu ka chhiarchhuak ve tawh a, a lehlin thu ah hian uluk a ngai dawn hle in ka hria. Rinna khawih thil, Pathian thawkkhum anih avang hian uluk taka buatsaih a tul in ka hria.
A tha khawp mai, sap ho in version hrang hrang an nei a. Mizo te erawh chuan lehlin pakhat chauh kan nei thung. Version hrang hrang neih ve hi a hlauhawm khawp mai, rin dan leh hriat dan a danglam thei dawn tlat. Tun ah pawh an letling dik lo tih sawi tur a awm ta fo mai. An leh dik loh chu ka ring chiah lo, version hrang hrang nen an khaikhin vang mai mai anih ka ring. Sap ho bible zawng zawng mil a siam kan tum anih chuan kan thurin hi kan pawlh dal mai mai ang tih a hlauhawm lo maw?
ReplyDeleteHe blog thukhel chu a thupui tham hle mai. Ni e, a pawng ataka sap ngaihsan lutuk hi chu a fin thlak ber lovang.
ReplyDeleteBible lehlinah pawh i sawi ang hian Mizo tawnga letling hmasa tute'n Hebrai leh Greek ngei enin an ti ani ang, an hming te pawh, eg. 'Isua' te hi, a Hebrai 'Yeshua' tih nen 'Jesus' tih daih ai chuan a inhnaih zawk hmel. Version hrang neih thuah erawh hi chuan, tawng lo danglam zelah hian version hrang neih chu a tul hun a awm theih ka ring, tunah a tul rih loh anih pawhin. Chu chu Saptawng mil zawnga siamthat tur tihna ni miah lovin.
English Bible hmang ho zingah pawh a pawng ataka King James Version ngaina tlat, a dang ngaithei miahlo and tam. KJV hi 17th Century emaw daiha lehlin ani a, tunah chuan a tawng hman hi a hlui lutuk tawh, Shakespeare-a tawng hman ang daih kha ani tawh a. Chumi siamthat nan New KJV an ti chhuak a, chu pawh ngaitheilo an tam ve nia!
Duhduha chin kual tur anih loh laiin, a chian zawk nana version dang siam chu a thatloh vakna ka hre lo. Mahse Mizo tawng hi chu a la upa vak lova, i sawi ang hian a siamthat tul lai siamthat bak chu a la tul lo maithei.
Blog a sawi atan chuan a sei duh deuh anih hi.
@Sangpuiipa:
ReplyDeleteI comment hlu tak avangin ka lawm e. Bible hi mi zawng zawngin kan hman a ni a, mihausa ber atanga rethei ber thleng, khawpui atanga thingtlangber thlengin, kan rinna kaihruaitu ber a ni. A bu chhung thu khawih danglam chungchangah kan fimkhur a ngai khawp mai.
@mesjay:
ReplyDeleteKa blog ah i rawn lenglut a, i tilawmawm hle mai. Ka thuziak min chiarsak vang te, chhiar liam satliah mai lova i ngaihdan tha tak tak (comment) min hnutchhiah sak avangin ka lawm hle mai. I hman chang chuan lo lenglut fo rawh aw. I comment a ngaihnawmin ka chhiar kham lo khawp mai.
Ani khawp mai, kan Bible hi kan zah a, duh duh dana siksawi vel hi a tha angem tih chang ka nei fo mai..
ReplyDelete