Good Governance Seminar ka chhim ve a

           Hmanni chu Good Governance Seminar Saikuti Hall ah, DEO lam atangin tel ngei ngei tura thupek khauh tak ka hmuh avangin thiante nen kan tel ve a. Miropui tak tak zingah, a member titamtu atana tel luih tir ve mai mai ni mah ila, thuziak tha tak tak paper present kan dawng a, a bengvarthlakin a ngaihnawm hlawm kher mai. Chawhma lamah "Rorelna Dik - Bible-in a zirtir dan" tih thupuia hmangin Rev. C Rosiama'n seminar a kaihruai a. Chawhnu lamah "Rorelna Dik - Mizoramah" tih thupuia hmangin Revd. C Lalsangliana'n min kaihruai bawk. Kan resource person te an tha dun bawk a, a ngaihnawm khawp mai. 

          He seminar hi Ethics Committee ina a buatsaih a ni a, inzirtirna tha tak leh pawimawh tak anih avangin Mizoram Chief Minister Pu Lalthanhawla te nupa leh a thuihhruai te paw'n an ngai pawimawh a, an rawn tel bawk a. Chu mai bakah Autonomous District Council lama CEM leh an thuihhruai te nen, Lunglei Officer lian tak tak te nen, chung ho karah chuan keini ang mai mai kan han thu ve phak hrim hrim pawh kha a ropui ka ti.

Kan khuallian kha:

              He seminar -a khuallian chu kan Chief Minister Pu Lalthanhawla a ni a. A hun diktakah a lo thlengin ka hria. Khuallian thenkhat tih dan ang lo takin kan Chief Minister te nupa hi chawhma hunah leh chawhnu hunah an thu tluan chhuak zak nia maw le. A rei a, keini pawh mawngza kan thawh uai uai lai paw'n an thu nghet churh mai. Midang tan a ruka haw daih ngam chi a ni lo. Kan khuallian khan thusawina hun tawite a nei a, a thusawi a tawi fel a, a tawngkam erawh a thluai thlum teh chiam lo niin ka hria. Corruption pawh kha a zung chawpa phoro a la tum hle.


Discussion kha a nawi ru deuh ka ti....

            Kan thupui a thata kan thu ngaihthlak te a ropui tehreng nen, sawizauna hunlaia mipui lam atanga thusawi thenkhat kha chu a nawi ka ti. An rawn sawi zau ang a, zawhna te an rawt zawt bawk ang chu tih laiin thu ho mai maia riat ral ta mai mai te, engemaw vuivaina rawn au chhuahpui ta te an kat nuk mai. Eitur sem dan a inang lo, chhim lamah khaw awmdanin a zir loh avanga electric chhia tih vel te, a hun tak aiin minutes tlemtein kan tan tlai, etc tih ang reng kha chu kan seminar nen chuan a inpersan lek lek deuh em aw ka tia.  Thahnemngaih a na bawk a, duhthawh a awl lua te pawh a nia nge.

Seminar ka hlawkpuina te:

          Keia tan chuan a seminar leh a sawizauna ai mah khan chawhma hun leh chawhnu hun inkara eitur tuihnai tak an rawn sem kha ka hlawkpui emaw ni chu tihtur a nia. Tui bottle in min rawn chhawp a, paper min present a, eitur tuihnai takin minhrai puar bawk a, a hlawk thlak hle mai. Notepad leh ballpen min han pe tel phei se chuan eng eng emaw kan lo chhinchhiah ve thei ang a, a man a tam lutuk lem loh nen, an tichangtlung tep asin maw le.

             Sawi hmaih theih miah loh tur Leitlangpui chhulchhuak Bethsy Lalrinsangi leh Pensy B Lalthangliani te zai ngaihnawm tak kan ngaithla bawk a. Hmeltha bawk, zaithiam bawk si hi chuan mit leh beng an lo titlai ber anih hi. Hemi te pahnih hi Baptist Higher Secondary School atanga lehkha zir chhuak an ni tih hi ka'n zep tel zauh teh ang..... Zaithiam pahnih zai live-a ka ngaithla thei hi ka hlawkna pakhat chu a ni leh a.
          

            A tawp ber atan chuan  sorkarin anmahni khalh ngiltu tur leh, an kal dik lohna lai hrilh thintu tur, sorkar kalphung tha taka sorkar hnathawkte fuihtu tur tein Ethic Committee a lo din ani tih ka hriat phah a. A ruka Ethic Committee in hma a lo lak ve thin dan te ka hriat phah bawk. A thalam kawng zawhna tur pawh nise, mahni dik lohna leh tlin tawk lohna ngaihthlak fo hi a nuam miah lo. Mahni diklohna hrilh hretu tur leh zihhau tu tur sorkarin a ruat ngam hi a ropui ka ti ve hrim hrim a ni tiin ka'n tlip mai ang e.