Hun leh ni a liam zel a, rin loh karin hringnun chawhnu lamah ka hun hmang ve tan ta mek a lo ni reng mai. Infiamna kutpui neih nikhua ah pawh ‘veteran’ lamah kan tel ve ta zak zak mai. Mithenkhat intih naupan reng tum tan chuan 'chanchin thalo' a ni thei ang a, keini ang kum lama buai ve lo tan chuan upatna hi kan tan buaina a tling ve reng reng lo thung. Enge maw tih nikhuaah “Ka pu” tia min ko nawlh nawlh tawk an lo awm ve leh zel te hi nuam deuh mai a nia. Mahni lo maha tha a la zat vei zer zawr nen, thenkhat tan chuan 'upa' kan lo ni ve ta reng chu anih hi.
Engati nge mithenkhat hian upata senior nih hi an hlauh em em thin le? Upa tur chuan vanneih a ngai asin. Kan unaupa pakhat pawh a nupui fanaute nen hlim taka khawsak chhoh ve a, upat hnu thlenga fate enkawl chhoh zel a chak em em chungin Pathianin a remti miau si lova, ui chung chungin he khawvela inhmu leh tawh ngai lo turin hringnun hi a chhuahsan asin. Upatna hi Pathian khawngaihna liau liau a ni. A naupan reng theih lohva, kan duh emaw duhlo emaw nitin darkar tinin kan upa tulh tulh dawn tho tho.
Kan thianpa pakhat BA zir zo tawh, BEd a training lai mek khan “Kei chu ka la naupang em mai a,” a ti thla zen thin a. A dik, keini ai chuan a naupang, mahse amah hrim hrim kha a naupang lem lo. A sawia insawi naupan chi a ni lo. Kumin a chaldelh tawh maiu chuan intih naupanin awmzia a nei lova, naupangchhia ang maia awm thar leh velin awmzia a nei lo. Kutzungtang seh tat chungin zuang su auh auh pawh ni ila, hmel a chal tawh miau si chuan, awmzia a nei thui tak tak tawh lo. Leilunga thilte hi engmah reng reng a ngai renga awm thei a awm lova, a lian ber atanga a te ber thlengin kan inthlak che vel reng a ni tih hi, kan hun tawn danglam reng thin hian a hril chiang khawp mai. Engkim hian hunbik a nei a, naupan hun a awm ang a, upat hun pawh a awm tur a ni dawn lawm ni. Kan thil tawn apiangah hian kan in adjust thiam ve zel chu a ngai dawn a lo nih hi. Kum a upa a, chhingmit khawthlir erawh a upa ve si lo hi a chang chuan a buaithlak thin dawn a lo nih hi........
Kei pawh, mi fate’n infiamna an chawlhsan hun, inkhelmi te pawn an boot an dah thata inkhelh an bansan hmiah hun kum bawr chhovah inkhelh lam ka han buaipui chho ve leh a. Thenkhat tan chuan a nuihzatthlakin a atthlak dawn mang e aw. A hun hi chu a dik tawh chiah lo na a, ka hriselna hian a mawmawh maiu si a, ka ti lo thei lo anih hi. Upat lamah inkhel tluk tluk ila a ni mai alawm.... ha ha ha.......
A ni ngawt tak mai, hnam pui ho pawhin sam tuak hi rangkachak a ni e an tih kha.
ReplyDeleteChuti chu rangkachak ka va ngah bik ve..... ha ha ha.... thlatinin ka Duhlaiin min dye sak thin maw le.
DeleteThu leh hla ziah duah te hi upat hri chu a ni mai law mi :)
ReplyDeleteA ni ve deuh chuan ka hria..... upatna hian fawmkem a lo ngah viau dawn mai.
DeleteBen-a, i hun chep tak karah pawh ka blog min rawn tlawh sak hram hram thin a, ka lawm hle mai.
Num tam nei lovin, kum tam ringawt kan nei ang tih a hlauhawm...upat chu a tha, nun tam nei bawk ila.
ReplyDeleteKhai a.... 'nun tam' neih kher a tul emaw ni le???? Upa tur chuan kum tam a ngai asin... kum tam tur chuan 'survive' a ngai. Sipaiah pawh, a dama te bawk hi an kaisang thin an tih kha.....
DeleteUpat tulh tulh mai hi chu a sim a sim theih nise ka ti ngawt mai hairehai.
ReplyDeleteIntih upat leh intih naupan hmmm, tar anga inngaih lohna hian minti tar har an ti lawi bawk si/ Naupang chhia anga che nilovin, ngaihtuahna lamah upa tak nitawh angin inngai lo ila a that mai ka ring e a :)
Pathian zara dam chuan upat ve mai hi chu a lo harsa dawn lo khawp mai, mahse 'mipuitling' nih hi erawh a harsa ka ti. He hringnun kawng chhukchhovah hian engtikah nge puitlin kawng hi ka zawh ve ang aw ka ti thin.
DeleteKa tlak duah chu le...... Ti daih teh ang, Pu HV, khalamah chuan nula senior te hi in hmuh dan a danglamin fiamthu thawh nan in hmang ve ngai lovang tiraw.... Mipa hi kan zia, nula upa hi an khawngaihthlak thin ka ti.
Kum tling tawh, ie:18+ hi tumah upa/senior ti a an hnunglam atanga nuih sawh (Mizoram angin) a awm velo.
DeletePuitling rual (adult) nih a awl laiin puitlin (matured) hi a harsa ngawt tak asin!
Nula senior kan en dan leh kan fiam nawmnah dan te hi ka vei thin khawp mai. Nula senior ho hian 'nula senior tak' nih hi an duh loh ber leh an hreh ber a ni ve a, nuam lo an tiin an inkiltawih fo thin. Chuti chung pawha an han diriam zui phei hi chu aw......
Deletechu, tara lamah i han young tha leh elaw. Kei pawh hei peih vang ni miah lovin ka tlan tan.
ReplyDeleteUpat hi a har lo khawp dawn mai. mahse a hlu lawm le.
Sam hi a hranpaa zuah a ngai lo, rinloh karin amahin a lo sei ve mai. Kan kum pawh hi hetiang deuh tho hi a lo ni. La upa lo emaw kan intih lai hian mi hian min lo ngai upa hma khawp mai. Pu HV-a te an fit tiar tiar si a, khawnge i han inla fit chho ve tan dawn ang hmiang.
DeleteUpat hi a lo har a ni. Rilru hian kum 20 emaw ka la nih inti thin mahila taksa hian a lo pha tawh silo. Hawivel ila aia naupang hliiiir an lo phu mur mur tawh mai si, where did the time go tih hi kan inzawt kan inzawt mai a ni.
ReplyDeleteAduh, i rawn lenglut ani maw. I tilawmawm hle mai. Nang te chu en reng rengin i la upa lo tih a hriat. Chutin insawi upat rawn tum ve ngawt suh.
Delete'Upa tur chuan vanneih a ngai' i tih khi dik ka va ti kher ve aw... Ka pawm zawng tak a ni. Upat mi nih châktir hliah hliah mai, i thuziak chu. Kum upat avanga rilru hnualte tan beiseina nung a siam tharsak ka beisei khawp mai.
ReplyDeleteTS, i comment hi spam lamah a lo awm daih a, rei tak ka hmu lova, tunah ka hmu ve chiah. I comment hlu tak avangin ka lawm e.
DeleteUpat hun hi ka lo huphurh ru ve ringawt zel a, thiante nen a han ti ti ho na ah pawh ka sawi chhuak leh nawlh thin. I thu ziak chuan min ti harh kawk mai a, mahni duh leh duh loh lam pawh anilo, kan dam reng dawn nge dawn lo pawh hriat loh lehnghal. Sawi tawh miah loh tur ani. Upa te hlutna min hriat chhuah tir in ka hria. "Kutzungtang seh tat chungin zuang su auh auh pawh ni ila" helai thu hian min ti nui sak mai. tawi te in. he.he.he...
ReplyDeleteI comment hlu tak avangin ka lawm e. Hmanni chu football ka khel ve ngawt mai a. Hmana ka taksa fit that zek zawk lai ang khan chet ka tum ngawt mai a, a lo theih reng reng tawh loh. Upatna hian ka hriat loh karin zawi zawiin min man ve tan ta ani tih hi, ka duh emaw, duhlo emaw, ka pawm ngei chu a ngai ta. Upa te hi an lo hlu tiraw. Ka pa kha la dam se chuan a upa ve tawh ngei ang. Dam hi a lo hlu a ni, tar tur chuan vanneihna, hriselna, damreina, a ngai tel tlat.
Delete