Sunday, March 20, 2011

BSNL Post paid Bill online hmanga pek dan

Thenkhat tana thu ho mai mai leh thenkhat tan phei chuan tangkaina nei reng reng lo, mahni tawn hriat ang ang te hi i han ziak leh chiam mai ang hmiang.          

Mobile phone bill pek lama harsatna

            BSNL post paid ka hmang thin a. A hmang ve in awm anih chuan hmang ve thin te chuan bill pek ninawm zia in hriat ve theuh ka ring. Heta "a ninawm" ka han tih hi, bill pek duh loh lam ni lovin, bill pe duh reng chung si a billpek harsat em vang zawk a nia. A hma chuan Dakinah bill ka pe mai thin a. Tlem lai deuh atang khan bill a lo thleng tlai hle thin a. Last date ah ka pe thei chauh mai a. Chumi tum chuan dak kal muan vang nge, ka bill pek an hmu tlai a, ka outgoing call min bar sak hmiah mai. Customer Care ka phone vat a,  "Chumi khami chu phone ta che, inhnuai lam ami te phone ta che," tih ang reng vel min tih kual vak hnu ah, a thawktu zinga pakhat, mipa fel deuh mai a awm a,thil awmzia min hrilhfiah a. ani chuan min rawn chinfel sak ta a. Ka lawm kher mai. Office-a thawk mifel tak leh biak nuam tak tak ka tawn thin te hi mipa an ni duh khawp mai.

            Hemi hnu atang phei hi chuan a hun takah bill ka dawng ta lo. Mahse sms in bill chu ka dawng thova, ka bill pek tur zat chu ka hria. Mahse hetiang ang hi chuan an office ah kal a ngai a. An office ah duplicate bill min print chhuah sak a, chu bill hmang chuan kan pe leh mai thin. Bill a huna dawn tak si loh ah chuan Dakin lama bill peka rem ta lo. Office lamah kal ziah a ngai dawn ta mai. Ka buaina tawh ang hi midang buaina pawh a lo ni ve tho si a, dakin lama bill pe thin ho zawng zawng khan office ah bill pek tumin kan han in line ta mia chuh, a pui khawp mai. Building chhawng chunga awm kha kan in line a, step ah nen, hnuai lam kawngpui bul thlengin kan intlar anih kha. Mi pakhatin bill 5 te an han hum mai chuh... kan in line kha a kalsawn mawh khawp mai.

           A tawp a tawpah chuan ka ning lutuk a, ka tlan haw a. Internet hmanga pek dan ka ngaihtuah ta a. Ngaiteh, internet atang chuan bill pek a lo harsa reng reng hleinem maw le. Kan hmet keuh keuh va, bill kan pe zung zung thei reng a lo nih hi. Chi thum laiin bill a pek theih leh nghal. In hriat vek hnu pawh ni tho mahse, ka han share ve reng reng ang che u.

Mahni bill zat enna: 

        SMS ah BILL hi type la, 53333 ah thawn rawh. I bill pek loh a la awm emaw, bill thar i la hmuh loh a awm anih chuan, message i dawng mai ang. Internet atangin i bill zat te chiangkuang taka i en duh chuan, he site ah hian i lut dawn nia:  http://portal.bsnl.in/celloneduplicate/apcelloneenquiry.aspx
(Phone no leh account no dah luhna tur a awm ang a. I account no kha chu i bill hluiah khan hmuh tur a awm reng ang.)


Bill pe thei tura in register dan:

         I bill zat i hriat hnu chuan a chungah khan "PostPaid mobile" button a awm kha, kha kha i click dawn nia. I click zawh veleh hetah hian a luhpui ang che: 

         Log in form a lo lang ang a. A hnuai chiah ah khan in register na tur a awm ang. Kha kha han click keuh la, i in register dawn nia. Kan Circle kha BSNL North East I kan nih kha hriat reng tur.


Bill pek dan tur chu le:

     1. Anmahni website atangin:

          I in register zawh hnu chuan Login form atang khan han lut rawh le. View/Pay Outstanding Bill tih button kha i click ang a. Select Circle tih inziak a lo awm ang a, North East1 kha select ang che. I outstanding bill a lo lang ang a, chutah chuan i phone number leh Invoice number a lo lang ang a, i bill zat nen. 

          Bill i pek duh chuan Invoice number kha click ang che. Tichuan complete bill details a lo lang tuarh mai ang. A hnuai ah khan Bank select tur a lo lang tuarh bawk ang. I netbanking neihna ber kha (A chung ber kha a ni mai) han select la, tichuan Make Pay button click rawh... 

I click veleh hei hi a rawn lang maithei a, a lo lan chuan OK i click ve mai dawn nia:

The portal system has detected attempt(s) to pay this bill earlier but we have not received status of those payment transaction attempts from the BANK system at this moment. Please press OK, if you have not made the payment successful in the BANK or press cancel.For more details, please refer to the NOTE at the bottom of this page.

         Choose your payment Option a lo lang ang a, Internet Banking kha i select ang a, chumi hnuah Please select your Bank and click on "Submit": a lo lang leh ang a, i bank duh ber kha click la, submit button hmet rawh le. Chumi hnuah chuan Maawma of misual.com in a sawi fo thin Payment Gateway lamah ah a luhpui tawh ang che a, i netbanking account ah a luhpui daih dawn che a ni.

(Hetah tak hian kan bank account neihna a zirin a rawn lan dan a danglam thei ang. Kei chuan SBI ka hmang a,  chuvangin SBI lama a landan chiah ka hria. Bank dang atang pawhin harsa lo turah ngai ang.)

          Mahni online bank account a kan luh hnu hian BSNL Bill payment form a lo lang a, kan pek duh zat a lo lang nghal bawk. Account Number click turin a lo lang a, click hnuah chuan Confirm button hmeh chiahin min dal ta. Confirm kan hmeh veleh keimahni mobile phone ah transaction password an rawn thawn nghal a, chu password chu kan fill up hnu ah confirm hmeh leh tur. Confirm hi vawi hnih hmeh a ngai mai thei. Kan confirm hnu chuan Bill kan pe zo hmak tawh tihna a ni.

Payment receipt hi print a tha:

         BSNL site ah min dah lut phei leh nghal a, chutah chuan kan bill pek dan zawng zawng Receipt Details a rawn lang tuarh mai. Chu chu save hmak emaw, print emaw a tha. Enge maw complaint a awm pawha complaint na tur a ni ang.

A hnuaia Print button hmeh khan a in print loh chang a awm thin. Chutiang hunah chuan File Print preview/Print/ tiin ka print thin. A tul lem lo na a, ka preview hmasa deuh kher thin.


      II. Mahni netbanking site atangin:

          Netbanking site ah luh phawt tur. Chumi hnuah Add Biller e-pay ah khan luh leh tur. All India Billers kha i click ang a, Select Biller  tih ah khan BSNL CellOne i select ang , tichuan Go button kha hmeh mai tur.

          I nick name i dah ang a, a hnuaiah i mobile number i type bawk ang. Auto pay i duh leh duh loh kha chu i thu thu. Ka thlan tur ni ta se, ka duh loh ka ring. Auto Pay anih chuan Pay Limit pawh siam nghal tur a ni ang. Tichuan submit button i hmet dawn nia. Tichuan bill i pek thin tur kha a in register thlap tawh ang a, nakinah bill i hmuh hunah awlsam takin i pe zung zung thei tawh mai dawn a ni.


      III. SBI Mobile Banking atangin:

          SBI mobile banking te reuh hi a tangkai phian a nia aw. Account danga pawisa thawn nan te, mobile top up thun nan te mahni account check nan te a tangkai reuh khawp mai. A software (State Bank freedom) hi an office atangin lak a, install mai tur a ni a. Tin, an website atangin a download theih bawk. Kan mobile number nen an thlunzawm ang a. Internet ngai miah lovin, awlsam takin thil a tih ve zung zung theih thin. SBI a saving account nei tan chuan hei hi neih ngei ngei a tha khawp mai.

         SBI mobile banking ah lut la, Bill Pay tih kha hmet la, Add Biller hmet leh la, option atangin Add kha hmet rawh. Heta tang hian kan bill pek duhna kha register mai tur a nia. Mahse ka la ti chhin lo.


Online bill payment ah harsatna lo tawk ta ila:

          Kan bill pek sa chu la pe miah lo angin a awm thei tlat. Mahse, a pekna hmun tur dik tak, an computer data ah kan pe fel thlap tawh a, an website ah pawh check ila, success a inti tawh a, outstanding bill pawh a awm tawh lo. Mahse, an office lamah erawh bill la pe lo angin a awm tho mai thei. Hei hi bill la pek loh vang ni lovin, BSNL office lamah an la update loh vang mai mai a ni ang. Hetiang anih chuan BSNL customer care ah phone mai tur. Hetiang hun a lo thlen chuan kan receipt print chhuah kha a pawimawh ta a. Khata transaction number kha a pawimawh hle ani tih hriat tur a ni. BSNL customer care rau rau ah pawh he number 03892310000 lo dawngsawng thintu mizo pa hi a fel khawp mai. Ani hian min pui hreh hauh lova, ka harsatna ka hrilh chuan min rawn pui chat chat thin. He pa hi tunge maw ni le? BSNL mobile phone lamah harsatna engemaw a awm chuan lo be ve mah teh u, biak a nuamin a fel khawp mai.

          Thiante zingah BSNL bill pek lama buai leh ning ve em em thin in awm chu ka ring hauh lo na a, mahse kei hi, tunlai chu thu leh hla lamah ka ro vin ka hul hle mai si a. Thu tha leh thlum, zirtir nei tha hlui ve tur che u nei ve lo ta chuan, ti hian mahni experience neih ve chhun te te hi ka han share leh hluai che u anih hi. 
  

13 comments:

  1. tiang hi lawm hrelo te tana tangkai em2 tur chu..i thawk tha khawp mai

    ReplyDelete
  2. @Ramenga:
    I tilawmawm e. BSNL bill pek hi last date awm thin anih vang te, a hun taka bill a thlen thin loh avang te hian harsatna ka tawk fova; hetia online hmanga awlsam taka bill a pek theih hnu hi chuan harsatna tawk tawh rih lo turah ka inngai. I lo lenglut a, ka lawm e.

    ReplyDelete
  3. Hotupa, a bengvarthlak khawp mai. Kei pawh online hian ka pe mai thin a, a zia khawp mai. 1% discount an la pe zui, beitham ve tiah tiah.

    ...khrum

    ReplyDelete
  4. @khumchikthei:
    1% discount chu sawi loh chawi belh dawn pawh ni ila, mi tam tak kara harsa taka intlara bill pek ai chuan, online hmanga bill pek zel hi ka thlang ta. A lo hahdam thlak zawk daih anih hi. Tui bill te, current bill te hi online hmang hian pek theih law law se ka ti khawp mai.... Nang nge nge i lo advance bik thin mang e.

    ReplyDelete
  5. BSNL ka hmang lem lo va, a chunga harsatna ang khi ka hmelhriat lo va! Online-a bill pek chu a awlsam zawk ngawt ang chu, hmeichhe hawihhawm lo tak tak hmuh reng ngai lovin in atangin in pe zat zat mai dawn a. Mi mawl ber tan pawha hriatthiam theih turin a rawn ziak chipchiar a, a thain a tangkai ngawt ang le..

    ReplyDelete
  6. @TS:
    Online hmanga bill pek tih vel mai mai hi chu thenkhat tan chuan ho tak a ni ang a, mahse tumah rawn hauh lova ka hmeh chhuah ve a nia, ka intithei ve asin aw. Internet khawiha thut paha bill pek mai chu a lo awlsam khawp mai.

    ReplyDelete
  7. A va bengvarthlak ve le. Mi dang i share ve phal hi ka ngaihlu khawp mai. Thenkhat hi chuan thil tha deuh an hriat hi chuan an zep tut zel!

    ReplyDelete
  8. @dolerich:
    Nang nge nge, i tilawmawm thin e. Mahni tawn hriat ang ang han ziak te hi a nuam ve riau asin.

    ReplyDelete
  9. Ka type sual zeuh! Pu Cari, min lo hrethiam teh! Ka comment hmasa zawka 'Mi mawl ber tan pawha hriatthiam theih turin a rawn ziak chipchiar...' tih khi, ...i rawn ziak chipchiar...' tih zawk tur a nia, ka lo type sual palh a ni e!

    ReplyDelete
  10. TS, a ho em mai. A inang reng alawm. Titi kar lakah pawh second person leh third person te chu kan sawi pawlh nawk nawk fo alawm. A awmzia a inang reng a, i mi fakna khi a lawmawm dana inang reng bawk. I comment chhiar a nuam thei khawp mai.

    ReplyDelete
  11. Tun hma BSNL post paid ka hman lai kha chu nise ka va han tangkaipui dawn tak em, bill pek ka nin theih zia kha aw... tunah chuan ka mamawh lem lo nain bsnl hmang tan chuan a tangkai hle dawn khi. Mobile banking erawh khi chu neih ve a that khi. Ka thawhpuite hi BSNL hmang an awm nuala bill pe turin an kal fo mai, hrilh ila, i thuziah hi chhiar sela an hlawkpui khawpin ka ring.

    Nang nge nge i hul lai ber pawhin thu tangkai tak post tur i la nei thei hram zel a nih hi. Mahni inhai veng thei chi hi chu an lo awm a ni tih i experience a tang pawh hian a chiang khawp mai.

    ReplyDelete
  12. @triplestar:
    BSNL post paid bill pe tura intlar ninawm zia i hria a, i bansan ta ani maw? Kei ve hi zawng, BSNL hi ka la kalsan tak tak thei lo anih hi. Mobile banking chu ti ve chhin teh, a sofware pawh hman a nuamin a "friendly user" riau asin.

    ReplyDelete
  13. I’m extremely inspired with your writing abilities as smartly with the structure for your blog

    ReplyDelete