Rukru hnam kan ni si lo

           Khawpui dai hnaia huan nei te’n an sawi ta fo mai a, ka han tuihnih ve ang e. Kan khawpui dai hnai mai ah mi tam takin huan an nei a, bianga thlantui far zawih zawih leh hah taka hna thawkin an huan ah thlai leh thei chi hrang hrangte an ching a. A rah seng a lo hun a, a neitu in a seng hma hmaa lo seng khalh thin te ka hre fova, a chang phei chuan a neitu aiin midangin an chang tam ta daih thin zawk niin huan neitu te ka atangin ka hre ta fo mai.

            Huan neih hi tih mai mai a ni lova. A bul tan a hautak em em a. Lovah a ngai a, hal a ngai a. Hal hnuah mang khawh a ngai a. Chumi hnuah duh ang thala lei sawisak a lo tul leh a. Huan nghet tur anih phei chuan uluk taka design a ngai thin. Terrace garden siam tur te, SALT farming system atana huan design te leh design chi hrang hrang pawh ni se, a hna a hautak thei em em thin. Terrace garden siam te hi a hautak zia kan hriatpui lo fo thin. Huan nei te hi, hausak vanga huan nei an ni ngai lova, pi leh pu hunlai atanga thisena than hnan tlat tawh, huan neiha hlim taka hna han thawh a, a rah han seng te hi mi tam tak nunhlimna a ni thin.

           Miin sum tam tak sengin huan a siam a, rim taka hna thawkin tuk tin a thawk chhuak a. Taima takin thlai chi hrang hrang a ching a. Kumtluanin a enkawl a. Chutah a rah seng tur a awm ta maw tih ah, zing kar/tlaikar ah, huan neitu awm loh lai changin a rah an lo seng khalh fo thin. Rim taka kumtluana hnathawktu rilru nat tur zia reng an hriatpui si lo.

           Heti hi anih chuan kut hnathawh hian hlawkna a nei thei dawn em ni? Hah taka an thawh hah sa a bo zel anih si chuan tu nge huan siam peih ta ang le? Sava veh niawm taka mi huana kal dun dun, hawi kual zuk zuk a, mi hmuh loh hlana huan thlai lawh ru zauh zauh hmuh tur an awm fo. Huan nei tam tak chuan an huan ah a vengtu tur hlawh neiin an chhawr a ngai ta. Hei hian hnam hmel a ti chhia. Rukru hnam kan ni miah si lo va.