Mobile phone

             Tunhma kum kha leh chenah khan mobile phone ka hre ngai lo va, mobile phone atan cheng khat mah ka hmang ral ngai lo, a mamawh pawh ka mamawh hek lo. Tunah zet chuan mobile phone handset kan ti, SIM Card kan ti, topup, recharge, bakah bill nen, SMS pack, a tihtlawmna, etc., pawisa kan khawhral hiau hiau mai. Tunhmaa enge anih pawh kan hriat ngai lem loh kha, kan chul kan chul a, kan hmet neuh neuh va, beng bulah dahin kan titi melh melh ta mai. "Balance ka nei lova" tih te pawh thenkhat tan tawng tualleng a ni chho ta hial mai. 


                Mobile phone dawr ah han kal ila, phone lei tum nge, hmuhnawm thlira thlir ve hrim hrim nge, mi an tam thei ngei mai. Mitin mamawh a ni chho mek zel si, chutihlaiin a tlo lutuk lem si lo, mobile phone zuartu te hi an hlawk thin awm mang e ka ti. A thar hralhna ai mahin acessories neuh neuh leh repairing ringawt pawh hi hlawkpuina tham a tling tho niin a lang bawk si. Mobile phone la nei lovin neih ve ngei an duh a, a nei mek te'n a aia tha neih belh zel an duh bawk a. Mobile phone hi thenkhat tan awlsamna a nih laiin, thenkhat tan chhungkaw nun tibuaitu a ni a, thenkhatin tullovah pawisa khawhral hiau hiau nana kan hman laiin thenkhatin an lo hausakpui bawk anih ber mai maw. Nula tlangval tan te hlei hlei hian a lo va tangkai tak em, thaikawi biahthu leh puarak palai reng a ngai tawh si lo.

Ka BSNL mobile zinkawng

                   Kan rama mobile phone service provider lo lut hmasa ber chu BSNL a ni tih kan hre theuh awm e. A tirah chuan mobile phone hi chuti tehluain a tangkai turah pawh ka lo ngai lem lo va. Thian te, thawhpui te'n an nei sap sap a, neih ve pawh ka tum lem lo. Mahse, nikhua a lo rei a, a pawimawh ta tual tual mai si. Mahse chuti maia awlsamin connection a lo tih theih ikhaw loh mai chu niin. A dilna form ringawt pawh a chuha inchuh a ngai a, thui tak tak intlar a ngai thin a. Hetih kar laka lo innek buai deuh te pawh an awm fo thin a nih kha.

                Mobile neih ve ka duh si, office ah form a awm si lo. Kan chhung te'n form an fill up na hnu, an hman leh duh si loh an kawl hlauh va, correcting fluid tam tawk tak nen ka fill up a, ka submit ve ta a. Sim Card a lo thleng har nangiang mai. Thla tam tak a ral hnuah SIM Card a rawn thleng ve ta hlawl a. SIM Card a lo thlen veleh Mobile handset Sony Ericsson T270 ka lei a. Biak tur ka ngahsa tawh bawk a, hman nghal mai tumin SIM Card ka han thun a, karei leh.....a nung thei chuang reng reng lo. An office lamah ka va kal, an lo la activate rih lo chu niin. An lehkhabupui ah an ziak lut a, chumi hnuah chuan a nung chhawm ve nghal mai turah ngaiin ngaihtha takin ka haw ta a. Ni a ral, chawlhkar a liam, a la nung thei chuang si lo. Ka nghak a, ka nghak zel a, thla tam tak ka nghak ta. Thla thum zet ka nghah hnuah nikhat chu ka phone a rawn nung ve ta hlawl mai. Mi ka duh duh ka be ve thei ta. Thiante zarah SMS thawn dan te ka thiam chho ve zel a, hman a nuam bawk si, rin aiin bill a tam duh khawp mai.

BSNL mobile application form la turin kan intlar

             Thla tam mobile phone ka hman hnuah, vawikhat chu BSNL mobile phone connection ti thar duh tan form an pe chhuak dawn a ni tih chanchinbuah ka hmu hlauh mai a. Ka nu tan form lak chhuahsak ve ka tum a. Zing hma tawk takah ka tho va, form an pekchhuahna hmun, Venglai lamah ka va phei a. A la hma deuh bawk nen, tlem chuan ka zak deuh. Mahse, ka va thlen nak chuan le, mitamtak an lo thu hmuk tawh mai. Tichuan ka han nghak ve ta ren rawn a. Kan Shillong awm ve laia MST bus ticket la tura tlaivara an nghah thin te pawh kha min tihre chhuak rum rum mai. Duh nei ka nia, ka duhna tipuitling tur chuan dawhthei taka ka nghah a ngai miau si a le. Ni a  tlangsang zel a, intlar kan tam tulh tulh, form an pechhuak lawk si lo, ril a tam tan ta, han phunnawi lah chu a ni chiah mang si lo. Ka va han ning tak e aw..... Ka hnunglamah intlar an thahnem bawk a, chang lo tur an tam dawn tih a lang reng mai. Application form la turin zing hma tak, khuantevikah ka tho va, ka lakchhuah meuh chuan fehrehsan hunlai a ni tawh. Tichuan hlimtak leh intithei tak chungin ka haw ta a. Khang hunlai kha chuan BSNL ho kha an va thu veu veu tak e aw....

Mi ram thil kan ngaisang thin si a

              Shillonga lehkha zira kan awm ve lai khan khasi ho vawksa kha kan lei thin a, a vawka a te thei si, a thau a pan thei si, a hmui lo bawk si, Zoram lama kan vawksa ei thin kha kan ngai thei thin hle. Chutah mahni khuaah kan han awm ve ta cheng a, 'Shillong vawsa rep ngat' kha hralh a tla leh em em tho si. Khasi ho vawksa kha a tui bik vang a lo ni lo, a hming, 'Shillong' tih hrim hrim kha kan ngaisang tel ni ta berin ka hria. Keini zawng, mahni ram ami aia mi ram thilte ngaisang thinmi kan ni si a.

               Vawi khat chu nu pakhat hian kuhva hring a rawn zuar a, "Shillong kuhva ngat a nih hi, a tui a nia, lei ve rawh u," a rawn tia. Kei ta pek chuan, Shillong kuhva a tui bik loh zia te, Shillong kan awm laia Zoram kuhva ro ei kan chak thin zia te, Shillong balhla phei chu a tui loh zia te ka han fah chiam kha. Thlai lamah na na na chuan Mizoram chhung ngeia kan thlai thar te hi an zahpuiawm loh thin asin. Mahse keini zawng mi ram ngaisang thin mi kan nia.

              Kan ram hi, kan hriat theuh angin, leilung chungril atanga laihchhuah lamah a pachhe hle a, lungalhthei takngial pawh laihchhuah tur kan nei lo. Mahse buh leh bal, thlai hnephnawl leh thei lamah na na na chuan, mi ram thar chhuah aia a tui loh bikna leh a hlut loh buikna reng reng a awm miah lo. Antam, maian, behlawi, bawkbawn, samtawk, tec., kan ram ami ngei hi a lo tui asin. Artu zuar ho pawh hian, 'sap artui' zuar tel ta se, an hralh chak ang chu aw......keini zawng, mi ram thil te ngaisang thinmi kan ni miau si a.

Infiamna

                Infiamna lam ti ngai lo ber hian infiamna lam ka'n ziak ve ang e. Taksa hi khawl ropui tak mai a ni a, eng lai pawha hna thawk reng mai, amah leh amah uluk taka inenkawl thei a ni. Kan taksa hi chevela hna thawk bawrh bawrh thei tura duan anih ang chiah hian thlan tla zawih zawiha hnathawh hi kan taksa hian a ngeih hle a. Tunlaiah mi kan awmawl tawh a, hnahram thawh ai chuan hahdam zawka hnathawh a hlawk zawkin a nuam zawk bawk a, kan hahdam mah mah hle a. Hei hian a hrinchhuah chu thau, dulkiar, thisen sang leh zunthlum te hi a ni. Tin, kan tihrawlte hi kan sawizawi reng loh chuan a lo nem a, a lang nalh thei lova, kan taksa pawhin resistance a neih chak loh phah hial thei thin. Kuthnathawh lam kan tlansan laklawh tawh si a, chuvangin thlan tla zaih zaih khawpa infiam hi kan taksa hian a mamawh hle a ni.

               Pa han nih hnu hi chuan hun a tight a, hunawl neih ang angah nupui-fanaute kilkawi ve an ngai a, infiamna hun takngial pawh a uiawm tham ta hle mai. Patlinga pumpa tlai huntha zawng zawng infiam nana khawhral fo mai chu, chhungte lakah a inthlahrunawm tlat thin. Mahse taksa hriselna aia hlu engmah a awm lo a ni tih hriat chian chuan he hun hi a uiawm loh hle thung si.

             Eng infiamna pawh hi ti ve dawn ila a hmanrua a ngai a, a hmanrua atan pawisa tamtak sen a tul thin. Mi thenkhat chuan zingah tlan ila, pawisa senral a ngai lova a tha ber an ti fo thin. Mahse zing tlan hi phur lai chauhva tih a awl fu a ni. Thil awm miah lo uma patlinga pumpa tlan vuk vuk reng peih chu mitlemte chauh an ni awm e. Infiamna erawh opponent te nena infiam paha intihhlimna a ni a, hma takah thawh kher a ngai lova, mahni hunawl neih huna va infiama va insawizawi ve mai theih a ni a, a thain a remchang hle. Peihawm loh tak leh enjoyment awm miah lova zinglam hma taka thawha tlan vuk vuk ai chuan taksa sawizawi paha enjoyment kan lo neih ve hi a hlu ka ti tlat. Tin, opponent awm miah lo infiamna hi chu a nuam lo hrim hrim bawk.